Magiging legal sa mata ng Estado ang annulment na ihinain sa simbahan o sekta para matulungan ang mga nakulong sa abusadong pagsasama, kung magiging batas ang panukalang ihinain ni Sen. Robinhood “Robin” C. Padilla.
Sa Senate Bill 2047 (Church Decreed Annulment Act), ipinunto ni Padilla na sa ilalim ng Family Code of the Philippines, maaaring i-solemnize ng pari, rabbi o ministro ang kasal at i-register ito sa civil registrar general – kung kaya’t makatwiran na may kapangyarihan ang simbahan o sekta na magpasya sa pagbabalewala nito – at kikilalanin dapat ito ng Estado.
“Whenever a marriage, duly and legally solemnized by a priest, minister, rabbi or presiding elder of any church or religious sect or any person authorized to solemnize marriages in the Philippines, is subsequently annulled or dissolved in a final judgment or decree in accordance with the canons or precepts of the church or religious sect in which the marriage was solemnized or in which either married partner is a member at the time of the request for the annulment or dissolution, the said annulment or dissolution shall have the same effect as a decree of annulment or dissolution issued by a competent court,” ani Padilla.
Sa ilalim ng panukalang batas, ang status ng bata ay tutukuyin base sa probisyon ng Family Code of the Philippines.
Kung ang basehan ng church annulment ay iba sa probisyon ng Family Code, ang mga “common children” na isinilang bago lumabas ang church annulment decree ay ituturing na lehitimo.
Ang maghihiwalay na mag-asawa ay magkakasundo sa paghati ng ari-arian; at sa kustodiya at pagsuporta sa “common children.” Kung hindi magkaroon ng kasunduan, susundan ang probisyon ng Family Code.
Itatala ang church annulment decree sa nararapat na civil registries kasama ang kasunduan ng mag-asawa hindi lalampas sa 30 araw matapos ilabas ang church annulment decree. Pagkatapos nito maaaring mag-asawa muli ang naghiwalay na mag-asawa.